പറഞ്ഞിട്ടും പറഞ്ഞിട്ടും തീരാത്ത അവളുടെ വിശേഷങ്ങളിൽ എവിടെയോ മാമ്പൂവിന്റെ ഗന്ധം അലിഞ്ഞിരുന്നു ,
കരിമഷിയിട്ട കണ്ണുകളിൽ , ബേബിപൗഡർ മണക്കുന്ന കഴുത്തിൽ , നനുനനുത്ത കൈവെള്ളയിൽ , കിലുങ്ങുന്ന പാദസരങ്ങളിൽ , പിന്നെയെന്റെത് മാത്രമായ രഹസ്യസങ്കേതങ്ങളിൽ അങ്ങനെയെല്ലായിടത്തും അവളെന്നെ കുരുക്കിയിട്ടിരുന്നു. അവരുടെയല്പത്തം കേട്ടവൾ കുലുങ്ങിച്ചിരിച്ചപ്പോൾ എന്റെ മേനിയിലെ കൊളുത്തുകൾ വലിഞ്ഞു കീറി ചോര കിനിഞ്ഞു; ഞാൻ മറന്ന തമാശകളെ മനസാ ശപിച്ചു. എന്റേതുമാത്രമെന്നുറക്കെ പ്രഖ്യാപിച്ചു ചേർന്ന് നിന്നപ്പോൾ ; എന്റെ കവിള് ചുവപ്പിച്ചപ്പോൾ ഞാനീ ലോകത്തിന്റെ നെറുകയിലേക്ക് കയറി. രാത്രികൾ അവളുടേത് മാത്രമാക്കി; നിശബ്ദനായി അവളുടെ നിശ്വാസങ്ങളും ഹൃദയസ്പന്ദനങ്ങൾക്കും മാത്രം കാതോർത്തു കിടന്നപ്പോൾ അവൾ പറയാതെ പറഞ്ഞ കഥകൾ കേൾക്കുകയായിരുന്നു ഞാൻ. സമയത്തിനന്നു പുതിയ സൂചികകൾ ആയിരുന്നു ; പ്രഭാതങ്ങൾ അവൾക്കു വേണ്ടി മാത്രം വിരിഞ്ഞ പൂക്കളായിരുന്നു.
എന്നായിരുന്നു ആ വേനലാരംഭിച്ചത്? തൊടിയിലെ പൂക്കലത്രയും കരിഞ്ഞു; നീണ്ട വിരസമായ പകലുകൾ പുല്ലു മേഞ്ഞു നടന്നു. ചോരവാർന്നു ഞാൻ മൃതപ്രാണനായി , തിരികെ നടക്കുമ്പോൾ ഞാൻ കണ്ടു , കാറ്റേറ്റു വീണ മാമ്പൂക്കളെ. ആരൊക്കെയോ ചവുട്ടിയരച്ച അതിനു നിറമോ മണമോ ഉണ്ടായിരുന്നില്ല .
